Турмуш ўртоғим 5 йилдан бери касалхонада лаборант бўлиб ишлайди. Ҳомиладорлиги учун туғруқ таътилидан олдин таътилга чиқди. Бир муаммо бўлдики, хотиним икки йиллик таътил учун ариза ёзмаган экан. Орадан бир йил ўтди. Иш жойи сақланиб қоладими?
Ш.МАҲМУДОВ,
“Ўрикзор” маҳалласи.
– Меҳнат кодексининг 404-моддасида кўрсатиб ўтилганидек, аёлга туғруққача етмиш календарь кун ҳамда туғруқдан кейин эллик олти календарь кун (туғиш қийин кечган ёхуд икки ёки ундан ортиқ бола туғилган тақдирда етмиш календарь кун) ҳомиладорлик ва туғиш таътили берилиб, қонунчиликда белгиланган, лекин ўртача ойлик иш ҳақининг етмиш беш фоизидан кам бўлмаган миқдорда нафақа тўланади.
Ҳомиладорлик ва туғиш таътили аёлга жамланган ҳолда ҳисоблаб чиқарилиб, туғруққача ҳақиқатда фойдаланилган кунлар сонидан қатъи назар, тўлиқ берилади. Ҳомиладорлик ва туғиш нафақасини тайинлаш ҳамда тўлаш тартиби Вазирлар Маҳкамаси томонидан белгиланиши кўрсатилиб ўтилган.
Кодекснинг 405-моддасида ҳомиладорлик ва туғиш таътили тугаганидан кейин аёлнинг хоҳишига кўра, унга боласи икки ёшга тўлгунга қадар болани парваришлаш учун таътил берилиб, бу даврда қонун ҳужжатларида белгиланган тартибда нафақа тўланиши белгиланган. Шу билан бирга ушбу модданинг 5-қисмида болани парваришлаш таътиллари даврида аёлнинг иш жойи (лавозими) сақланади, деб белгиланган.
Меҳнат кодексининг 408-моддасида ҳомиладор аёллар ва уч ёшга тўлмаган боласи бор аёллар билан тузилган меҳнат шартномасини иш берувчининг ташаббуси билан бекор қилишга йўл қўйилмайди, корхонанинг бутунлай тугатилиш ҳоллари бундан мустасно, бундай ҳолларда меҳнат шартномаси уларни албатта ишга жойлаштириш шарти билан бекор қилинади, деб кўрсатиб ўтилган. Юқоридаги нормаларга асосан турмуш ўртоғингизнинг иш ўрни сақланади. Шу билан бирга иш берувчининг ташаббуси билан бекор қилиш тақиқланади. Корхона тугатилган ҳолларда эса турмуш ўртоғингиз имтиёзга эга бўлади.