Вояга етмаган шахслар қандай ишларга жалб этилиши мумкин эмас? 18 ёшга тўлмаган шахслар меҳнатидан қандай ишларда фойдаланиш тақиқланади?
Дилафруз АКРАМОВА,
“Чиғатой-Оқтепа” ҳудудидан.
Ушбу саволларга туман Адлия бўлими юридик хизмат кўрсатиш маркази бош юристконсульти Сардор АБДУВАЛИЕВ жавоб беради:
Қонунчиликка мувофиқ, қуйидаги ишларда, яъни:
– ер ости, сув ости, хавфли баландликда ёки ёпиқ муҳитда бажариш;
– хавфли механизмлар, асбоб ва ускуналар билан боғлиқ бўлган;
– хавфли буюмлар ёки жараёнлар, ҳарорат, шовқин ёки тўлқинланиш даражасининг юқори таъсирида вояга етмаганларнинг соғлиғига зарар етказишга олиб келадиган зарарли шароитлардаги;
– оғир меҳнат шароитларида бажариладиган (иш вақтининг давомийлиги узоқ бўлган, тунги ишлар ва бошқалар билан боғлиқ бўлган);
– ўзининг хусусияти билан бундай тоифадаги ходимларнинг ахлоқ-одобига зарар етказадиган;
– белгилаб қўйилган нормадан ортиқ оғир юк кўтариши ва ташиш билан боғлиқ бўлган ишларда вояга етмаганлар меҳнатидан фойдаланишга йўл қўйилмайди.
18 ёшга тўлмаган шахслар меҳнатидан фойдаланиш тақиқланадиган ноқулай меҳнат шароитлари билан боғлиқ ишлар рўйхати ва 18 ёшга тўлмаган шахслар кўтаришлари ва ташишлари мумкин бўлган оғир юк нормалари чегараси Бандлик ва меҳнат муносабатлари ва Соғлиқни сақлаш вазирликлари томонидан белгиланади.