Мамлакатимиз қонунчилигида жорий йил 1 мартдан бошлаб бир қатор ўзгаришлар жорий этилмоқда.
Экспорт қилувчилар молиялаштирилади
Озиқ-овқат маҳсулотларини экспорт қилувчиларга экспортдан олдинги ва экспорт савдо операцияларини молиялаштириш учун 2 йилгача муддатга молиявий ресурслар ажратилади:
100 минг долларгача – экспорт ҳажми 100 минг доллардан 1 миллион долларгача;
- 1 миллион долларгача – экспорт ҳажми 1 миллион доллардан 2 миллион долларгача;
- 2 миллион долларгача – экспорт ҳажми 2 миллион доллардан 4 миллион долларгача;
- 3 миллион долларгача – экспорт ҳажми 4 миллион доллардан ортиқ.
Ижарага бериш тартиби ўзгарди
Қишлоқ хўжалиги ерларини ижарага беришда очиқ электрон танлов ўрнига электрон онлайн аукционлар жорий этилмоқда. Шунингдек, илгари очиқ электрон танловга қўйилган ва ғолиби аниқланмаган қишлоқ хўжалиги ер участкаларини онлайн электрон аукционлар учун автоматик тарзда рўйхатга олиш кўзда тутилган.
Айрим товарлар божхона тўловларидан озод этилади
2026 йилнинг 1 мартига қадар республикада ишлаб чиқарилмайдиган, тасдиқланган рўйхатлар бўйича тадбиркорлик субъектлари томонидан олиб кирилаётган аналоглари бўлган бир қатор товарлар божхона тўловларини тўлашдан озод этилди.
Қуёш панелларини импорт қилиш учун янги талаблар
Техник ҳужжатларида ёки ёрлиғида элементларнинг сифат кўрсаткичларини белгилайдиган тегишли “А”, “B”, “C” ва “D” синфлари тўғрисидаги маълумотлар мавжуд бўлмаган қуёш панелларини импорт қилиш тақиқланади.
16 та лицензия ва рухсатнома бекор қилинади
Ўзбекистонда 16 та лицензия ва рухсатнома бекор қилинади. Юридик шахслар лицензиялаш, рухсат бериш ва хабардор қилиш тартиб-таомиллари соҳасидаги ҳуқуқбузарликлар учун жаримани 15 кун ичида ихтиёрий равишда тўлаган тақдирда, жарима суммасининг 50 фоизи миқдорида, 30 кун ичида тўланган тақдирда эса – 30 фоиз миқдорида белгиланмоқда. 2025 йилнинг 1 январигача эксперимент тариқасида рентген аппаратларини ишга тушириш ва ветеринария-лаборатория ва диагностика ишларини олиб боришга ўтиш ва мослашиш даврини белгиловчи “Лицензиясиз тадбиркорлик” режими жорий этилмоқда.
Ижтимоий ишчи ёрдамчиларининг иш тартиби
Ёлғиз кексалар ва ногиронлиги бўлган шахсларга ҳафтанинг барча кунларида соатбай хизмат кўрсатиш мақсадида ижтимоий ишчи ёрдамчиларининг мослашувчан иш тартиби жорий этилмоқда. Ёрдамчилар фаолияти ҳар ойда бир марта ёлғиз кексалар томонидан шахсан, маҳалладаги ижтимоий соҳа ходимлари ва махсус дастур асосида баҳоланади. Баҳолаш натижаларига кўра, “Инсон” ижтимоий хизмат кўрсатиш марказлари ижтимоий ишчи ёрдамчиларини рағбатлантиради.
Ободонлаштириш учун янги талаблар
Баландлиги 12 метрдан ортиқ ва (ёки) умумий майдони 500 квадрат метрдан ортиқ қурилаётган янги бино ва иншоотлар, агар уларга туташ ерларнинг камида 25 фоизи ҳудудларни ободонлаштириш учун ажратилмаган ва уларда ободонлаштириш тадбирлари ўтказилмаган бўлса, давлат қабул комиссияси томонидан қабул қилинмайди.
Атроф-муҳитга таъсир кўрсатишнинг I ва II тоифаларига кирувчи саноат корхоналарининг лойиҳа ҳужжатларига мувофиқ берилган давлат экологик экспертизаси хулосасида ўзлари ва унга туташ ҳудудларда “яшил белбоғлар” яратиш ҳамда ободонлаштириш тадбирларини амалга ошириш бўйича мажбурий талаб киритилади.
Спортчилар учун ID карта
Спорт бўйича Ўзбекистоннинг расмий мусобақалари, чемпионатлари ва кубокларида иштирок этиш учун спортчиларнинг шахсини тасдиқловчи гувоҳнома (ID)дан фойдаланган ҳолда тегишлилиги ва малакасини аниқлаш тартиби жорий этилмоқда.
Тиғиз вақтларда юк машиналари ҳаракати тақиқланади
Тошкент шаҳрида юк ташиш учун мўлжалланган, Н2, Н3 ва О4 тоифаларига кирувчи, рухсат этилган максимал оғирлиги 10 тоннадан ортиқ бўлган юк ташиш учун мўлжалланган транспорт воситаларининг ҳаракатланиши тақиқланади.
Эндиликда жамоатчилик огоҳлантирилади
Ўзбекистон ҳудудларида чанг бўрони содир бўлганлиги ҳақида аҳолини хабардор қилиш амалиёти жорий этилмоқда. Атмосфера ҳавосидаги майда дисперс заррачалар миқдори белгиланган меъёрдан ортиқ бўлиши ҳолатлари аниқланганлиги тўғрисида Ўзбекистон фуқаролари ҳам огоҳлантирилади.