Қизи турмушга чиқиб кетганидан кейин ёлғиз қолган Доно Дадаева (исм-фамилия ўзгартирилди) ҳайҳотдай уйидан мақсадли фойдаланиш мақсадида бошқа вилоятдан келган 4-5 нафар лўлиларни ижарага қўяди. Уларнинг орасида Соҳиба исмли аёл ҳам бор эди. Ўшанда 2018 йил эди. Ижарачилар бир ҳафтача яшаб кетиб қолишди. Орадан тўрт йил ўтиб, 2022 йилнинг декабрида Соҳиба Донога қўнғироқ қилиб қолди: ”Келинойи, турецкий кўйлаклар бор, мижоз борми оладиган?”. Доно Соҳибанинг сўзларидан “турецкий кўйлак” дегани гашиш моддасини билдирувчи калит сўз эканлигини англаб: “Йўқ, унақа нарсага мижоз йўқ”, деди.
Ҳаммаси 2023 йилнинг февраль ойи аввалида бошланди. Таниши Нилуфар Дононинг уйига келиб пулдан қийналиб қолганлигини айтади. Шундан сўнг улар гиёҳванд моддалар савдоси билан шуғулланишга келишадилар. Доно Соҳибага қўнғироқ қилиб: ”Турецкий кўйлак борми, харидор чиқиб қолди”, – деди.
– Бор, – дейди у, – нечта оласиз?
Шундан сўнг улар донасини ва нархини келишадилар. Доно “мол”ни сотганидан кейин пулини берадиган бўлади. Эртаси куни Соҳиба унга “кўйлак”ни жўнатганлигини ва уни қаердан олиши мумкинлигини айтади. Доно “мол”ни у айтган жойдан олиб, ярмини Нилуфарга сотиш учун беради. Орадан бир муддат ўтиб Нилуфар унга Туркияга кетаётганлигини ва энди у бошқа одам билан ишлаши кераклигини айтиб, унинг телефон рақамини беради…
Бир ҳафтадан сўнг Соҳиба унга қўнғироқ қилиб “мол”нинг пулларини сўрайди. Пулни унга жўнатиб юборади. Бу орада Доно яна Соҳибадан “турк кўйлаги” сўрайди. Бу сафар ҳам “мол”ни Соҳиба билан бир вилоятда яшовчи, курьерлик вазифасини бажараётган Гуля Восилова олиб келиб беради. Энди Доно Нилуфар айтган Камрон билан бирга ишлай бошлади. Камрон бир-икки марта келгач, соғлиғи ёмонлашгани, шифохонага ётмоқчи эканлигини айтиб, ишини тўхтатади. Шу орада Нилуфар чет элдан қайтиб келади ва Донодан сотиш учун “мол” олади. Кечки пайт эса Камрон гашиш моддаси сотаётган пайтда қўлга тушганлигини айтади.
Доно типирчилаб қолади. Қўлидагиларни нима қилиб бўлса ҳам йўқотиш керак. У шу мақсадда маҳалласидаги Али Асадовнинг ёнига бориб, унга гиёҳванд моддани сотгач, кўнгли анча хотиржам тортади. Доно шу сафар охири яхшилик билан тугамайдиган ишига чек қўйса бўларди, лекин Али Асадовнинг бир ҳафтадан кейин яна гиёҳванд модда сўраб қилган қўнғироғидан сўнг унинг ўрганган кўнгли яна ўртанди, чунки мўмай даромад унинг кўзларини кўр қилиб қўйган эди. Дарҳол Соҳибага қўнғироқ қилиб, “турецкий кўйлак” сўрайди. Орадан маълум вақт ўтгач яна Дононинг қаршисида курьер аёл Гуля Восилова пайдо бўлди. Бу сафар уларни ҳуқуқ-тартибот идоралари ходимлари кутиб олишди…
2023 йилнинг 17 июль куни соат 19:40лар атрофида Дононинг уйига ИИБ ходимлари кириб келишади. Аёлнинг ошхонасидаги ертўладан гиёҳванд моддалар ва пуллар топилади… Шундай қилиб бу сафар гиёҳвандлик билан шуғулланувчи аёлларга “турецкий кўйлак” кийиш насиб этмади. Улар суднинг қарорига кўра, устларига маҳкума аёллар киядиган оддий кийимни кийиб, панжара ортига йўл олишди… Гиёҳвандликка ружу қўйган Али Асадовга 3 йилу 8 ой 5 кун муддатга озодликни чеклаш жазоси қўлланилди. Шунингдек, унга нисбатан Жиноят кодексининг 96-моддасига асосан гиёҳвандликдан мажбурий тартибда даволаш чоралари қўлланилди.
С.АВЛАКУЛОВ,
Жиноят ишлари бўйича
Зангиота тумани суди раиси.