Халқимиз бекорга “Қиш ғамини ёзда е”, демаган. Ёздаги тўкин-сочинлик бозорлардаги нарх-навонинг чўнтакбоплигига хизмат қилади. Қишга бориб эса ўша маҳсулотни бу нархга сотиб ололмайсиз. Шунинг учун ҳам ота-боболаримиз кузда картошка, шолғом, турп, сабзи каби қатор қишлоқ хўжалик маҳсулотларини ерга кўмиб қўйиб, уни қишда ва “илик узилди” пайтларда ишлатишган. Шу боис оила бюджети анча тежалган. Бугунги кунда эса бу анъанани фермер хўжаликлари давом эттирмоқда.
Тўғри, шу кунларда бозорлардаги нарх-наво куздагидан анча юқори. Биргина пиёзни оладиган бўлсак, унинг килограмми 10-12 минг сўмга кўтарилиб кетди. Лекин қишлоқ хўжалик маҳсулотларини арзонлаштирилган нархларда сотиб олиш имконияти ҳам йўқ эмас. Қишнинг дастлабки ойида туман марказида ташкил этилган қишлоқ хўжалик маҳсулотлари ярмаркасида нарх-наво меъёрида. Қатор қилиб териб қўйилган қишлоқ хўжалик маҳсулотларининг тепасига илиб қўйилган нархларга кўз югуртирамиз: пиёз 4 минг сўм, картошка 3500 сўм, гуруч 7 минг сўм, сабзи 2500 сўм, карам 3000 сўм, тухум 1000 сўм…
Бундай қулайлик ва қўллаб-қувватлашдан харидорлар мамнун. Туман ҳокимлиги мутасаддиларининг маълум қилишича, 2022-2023 йилги қиш ва баҳор мавсуми учун ҳудудий тайёрлов корхоналари томонидан куз мавсумида жамғарилган маҳсулотлар декабрь ойидан бошлаб деҳқон бозорлари ва ярмаркаларида сотилмоқда.
Маълумки, туманда қиш, баҳор мавсуми учун асосий маҳсулотлардан бўлган 823 тонна картошка, 120 тонна пиёз жамғарилган бўлиб, картошка “Агро Вер” МЧЖ корхонаси омборхонасида, 153,1 тонна гуруч бозор ташкилотлари омборхоналарида сақланди ва бугунги кунда сотувда. Туманда яна 1 апрелга қадар 50 тонна картошка, 100 тонна пиёз, 50 тонна гуруч қўшимча заҳирага эҳтиёж мавжуд ва бу келтирилади. Ярмаркага ҳар куни белгиланган режа асосида арзонлаштирилган нархлардаги қишлоқ хўжалик маҳсулотлари келтирилиб, сотилмоқда.
Ж.АРСЛОНОВА.