Таҳлилхонада ишлаш бошқа тиббий тузилмаларда ишлашдан фарқ қилади. Сабаби беморлардан олинган таҳлил намуналари билан ишлашда ўта эҳтиёткорлик ва масъулият талаб этилади. Чунки даволовчи шифокорларнинг беморни ташҳислаш ва даволашида таҳлил натижалари жуда муҳим роль ўйнайди. Шу боисдан ҳам давлатимиз томонидан бунга алоҳида эътибор қаратилиб, дори-дармонлар, кимёвий реактивлар учун катта сармоялар ажратилмоқда. Соғлиқни сақлаш вазирлиги томонидан 2023 йил 1 майда чиқарилган “Аҳоли орасида вирусли гепатитнинг В ва С турларини эрта аниқлаш ва даволаш тадбирларини амалга ошириш тўғрисида”ги буйруғига асосан туман Тиббиёт бирлашмасининг барча оилавий поликлиника ва оилавий шифокорлик пунктларига гепатит В ва С таҳлили учун тестлар берилган.

Таҳлилхоналарда бу таҳлиллар бепул амалга оширилмоқда. Таҳлил натижалари мусбат чиққан беморлар базага киритиб, даволанишлари учун туман Юқумли касалликлар шифохонасига жўнатилмоқда. Шифокор беморни ҳисобга олиб, гепатит В билан касалланган бемордан намуна олиб, туман Тиббиёт бирлашмаси қошидаги марказий таҳлилхонага ИФА усулида текшириш учун, гепатит С билан оғриган беморларни эса Республика Вирусология марказига ПЦР таҳлини ўтказиш учун юборади. Таҳлилхонамизда шифохонада ётган беморларга 36 хилдаги биохимик таҳлиллар ўтказилади. Бундай таҳлиллар аввал фақатгина хусусий таҳлилхоналарда амалга оширилар эди. Ҳозирда бу текширувлар аҳолига иқтисодий тарафдан катта ёрдам бўлмоқда. Бундан ташқари Оилавий поликлиникалар ва Оилавий шифокорлик пунктлари таҳлилхоналарида ҳам бир неча турдаги таҳлиллар бажарилмоқда. Буларнинг барчаси беморга ўз вақтида малакали тиббий хизмат кўрсатишга хизмат қилмоқда.

Зулҳумор ПАЙЗИЕВА,
туман Тиббиёт бирлашмасига қарашли
Марказий таҳлилхона катта лаборанти.