Юртимизда ҳукм сураётган аномал совуқ ва қорнинг қалин ёғиши аҳоли, айниқса, коммунал соҳалар – табиий газ, электр энергияси, ичимлик сув таъминоти, қўйинг-чи, ҳаётимизнинг барча жабҳасида маълум даражада қийинчилик ва муаммоларни юзага келтирди. Очиғи, юзага келган ана шу ҳолат халқимизнинг сабр-бардошию ўзаро ҳамжиҳатлигини яна бир бор синовдан ўтказмоқда, десак муболаға бўлмайди.

Президентимиз раислигида жорий йилнинг 16 январь куни қиш мавсумида аҳолини энергия ресурслари билан узлуксиз таъминлаш бўйича кўрилаётган чоралар юзасидан ўтказилган кенгайтирилган йиғилишда аёзли кунларда жойларда ҳокимлар, сектор раҳбарлари, маҳалла раислари, ҳоким ёрдамчилари, ёшлар етакчилари ва хотин-қизлар фаоллари уйма-уй юриб, аҳолидан хабар олиши, “Саховат ва кўмак” жамғармаси томонидан ёлғиз қариялар, кўп фарзанд­ли эҳтиёжманд оилаларга иссиқ кийим, озиқ-овқат тарқатиш, энг оғир ҳолларда уларни шароити бор жойларга жойлаштириш, маҳаллаларда иссиқ овқат тарқатиш пунктларини ташкил этиш бўйича тегишли вазифалар топширилган эди.

Ана шу вазифалардан келиб чиқиб, қолаверса, бугунги синовли кунларда туман ҳокимлиги томонидан ҳам бир қатор ишлар олиб борилмоқда. Жумладан, эҳтиёжманд аҳоли вакиллари, ногирон, якка-ёлғиз яшаётган фуқаролар, шу билан бирга, бугунги кун қаҳрамонлари бўлган йўлларни қор уюмлари, музлардан тозалаётган ободонлаштириш тизими ишчилари ҳолидан хабар олиш, уларга кўмаклашиш мақсадида “Меҳр-саховат улашиш” акцияси ўтказилмоқда.

Халқимиз барча даврларда ҳар қандай ташвишу қувончда бир-бирига елкадош бўлган, синовлардан эсон-омон ўтган. Албатта, бугунги синовли кунларни ҳам ҳамжиҳатлик билан енгиб ўтамиз. Энг асосийси, табиатнинг бу синови ҳар бир тизим раҳбарининг, айниқса, коммунал соҳа мутасаддиларининг ўз ишига, бажараётган вазифасига масъулият билан ёндашиши нақадар муҳимлигини яна бир бор кўрсатди. Ишонамизки, ушбу синов бизга сабоқ бўлади.

Шукрки, аёзли мавсумнинг, қиш чилласининг изғиринли кунлари ортда қолмоқда. Аномал совуқ юзага келтирган асоратларни ўз вақтида бартараф этиш, қийналган аҳолига кўмаклашишга қаратилган хайрли ишлар туманимизнинг барча ҳудудларида изчил давом эттирилмоқда.

Президентимиз томонидан белгилаб берилган тезкор чора-тадбирларга мувофиқ, туман ҳокимлиги томонидан 9 та ҳудудда 24 соат давомида фаолият олиб борувчи “Кичик ишчи гуруҳлари” ташкил этилиб, гуруҳлар аъзолари ўзларига бириктирилган ҳудудларидаги аҳолидан тушаётган ҳар қандай мурожаатни тегишли соҳа мутасаддилари билан тезликда ҳал этиш чораларини кўришмоқда. Туну кун иш фаолиятини олиб бораётган мазкур гуруҳларнинг ишлаши учун зарур шароит­лар яратилган. Ушбу барча ишчи жараён шахсан туман ҳокими, секторлар раҳбарлари ва коммунал соҳа раҳбарлари назоратида.

Шунингдек, туман ҳокимлигида телеграмм ижтимоий тармоғида аҳоли мурожаатлари бўйича бот – (https://t.me/ZTmurojaat_bot) канали ишга туширилди. Эндиликда, фуқароларимиз ўзларини қийнаётган муаммолар бўйича манзилли, мурожаат йўлловчи шахс ҳақидаги тўлиқ маълумотлар билан бирга ушбу бот-канали орқали йўллашлари мумкин. Ҳар бир мурожаат “Кичик ишчи гуруҳлар”и томонидан зудлик билан таҳлил этилиб, бу борада кўрилаётган амалий чоралар қатъий назоратга олинади. Қайд этиш лозимки, ўтган дастлабки уч кун мобайнида аҳолидан “Кичик ишчи гуруҳлар”ига 150 дан зиёд мурожаат келиб тушган бўлиб, уларнинг барчаси мутасаддилар томонидан ижобий ҳал этилди.

Шуни мамнуният билан таъкидлаш лозимки, туманимизда айни синовли кунларда кўрилаётган тезкор чора-тадбирлар, фаолия­ти йўлга қўйилган “Кичик ишчи гуруҳлар”и вилоят ҳудудида намунали тизим сифатида кўрилганлиги ҳар биримизни янада ҳамжиҳат ва уюшқоқлик билан иш олиб боришга чорлайди.

Шу ўткинчи ва синовли кунларда барчамиз ҳамжиҳатликда, бир-биримизни қўллаб-қувватлаб, маҳаллаларимиздаги ёлғиз, кекса қўшнилар, кўп болалик оилалар, фарзандини ёлғиз тарбия­лаётган оналардан хабар олишимиз, ногиронларга ғамхўрлик кўрсатишимиз лозим.

Ҳурматли тумандошлар, табиатнинг аномал совуғидан талафотсиз чиқиш учун барчамиз уюшқоқлик билан бирлашиб, ҳамжиҳатликда иш олиб боришимиз зарур.

Ҳасан САЪДУЛЛАЕВ.