15-16 сентярь кунлари Паркент туманининг Заркент қишлоғида “Узум сайли” бўлаётган эмиш! Бу хабарни эшитган одамларнинг кўпчилиги: “Бу йилги аномал совуқда токларни совуқ уриб кетган бўлса, қанақасига сайил бўлиши мумкин?”, деган бўлса, айримлар: ”Узумни совуқдан асраган соҳибкорлар бор бўлсин, бу йил узум бўлмайдими дегандик, бозорларимизда насибага ярашаси бор…”, дейишди. Шундай қилиб, биз – зангиоталик ёшлар ҳам бу узум сайли ва халқаро виночилик фестивалини ўз кўзимиз билан кўриб, завқланиш мақсадида бир автобус бўлиб “Қайдасан, Паркентнинг Заркенти”, дея йўлга чиқдик. Куз шамоллари танага ҳузур бағишлайди. Йўлнинг икки четида кўзга ташланаётган далаларда иш қизғин. Деҳқону боғбоннинг йил бўйи қилган меҳнатининг самарасини, она заминнинг саховати нақадар катталигини бозорларимиз тўкин-сочинлиги, далаларда етиштирилган ҳосилнинг салмоғида ҳам кўрса бўлади.

Кузги либосини кийган табиатнинг тароватидан завқланиб манзилимизга етиб келганимизни ҳам сезмай қолибмиз. Кенг дала, ҳали барглари яшнаб турган узумзорлар атроф­лари узумлардан ўзига хос композиция ясалган ҳолда байрамона безатилган. Вилоят туманларининг ҳар бири ўзига тегишли бўлган жойда узум кўргазмалари ташкил этган. Шунингдек, юртимизнинг барча вилоятларидан келган фермер хўжаликлари, вино заводлари, табиий ичимликлар, шарбатлар ва шарбат концентратлари ишлаб чиқариш корхоналари ҳам ўз экспозицияларини намойиш этишдики, бу наинки юртимизнинг турли ҳудудларидан келган меҳмонлар, балки Корея, Сингапур, Белорус, Грузия, Озарбайжон каби 30 дан ортиқ давлатлардан ташриф буюрган виночилик соҳасининг йирик ва етакчи ҳисобланган компаниялари вакилларини ҳам бефарқ қолдирмади.

Мамлакатимизнинг туризм салоҳиятини намойиш этиш, қадимий узумчилик, виночилик тажрибаси, боғдорчиликнинг ноёб турлари ва навларини кенг оммалаштириш мақсадида ташкил этилган фестиваль ҳақиқатан ҳам бетакрор эди. Фестивалда намойиш этилган Ўзбекистон Қаҳрамони Тожибой Ризаев ҳақидаги “Туганмас хазина” ҳужжатли фильми, фольклор жамоалари ва таниқли санъаткорларнинг чиқиш­лари, халқимизнинг урф-­одатлари ва анъаналарини акс эттирувчи маданий дастурлар барчада катта таассурот қолдирди. Шунингдек, фестиваль доирасида халқаро-илмий конференция, бизнес-семинарлар, хорижий ва маҳаллий етакчи мутахассисларнинг маҳорат дарслари ташкил этилди. Бу фестиваль нафақат узум сайли, балки ишнинг кўзини билиб, ҳар қандай об-ҳаво шароитида ҳам токзорларини совуқдан асраш ҳаракатини куздаёқ қилиб қўйган соҳибкорларнинг ҳалол ва фидокорона меҳнатларининг намойиши эди.

Назокат БОТИРОВА.