Оилада она маънавиятли, китобхон бўлса, унинг фарзандлари ҳам маънан етук, баркамол, Ватанга ўзгача муҳаббатли бўлади. Туман Ахборот-кутубхона марказида аввало уй бекалари, оналарни кўпроқ китоб ўқишга чорлаш мақсадида ҳар ойнинг 17 санасида “Китобхон оналар” куни ўтказилиши анъанага айланган. “Китобхон оналар” кунининг навбатдагиси 21 октябрь – Ўзбек тилига давлат тили мақоми берилган кун муносабати билан ноанъанавий тарзда ўтказилди. Тадбирда 14-мактабнинг фаол китобхон ўқувчилари ва уларнинг оналари болаларнинг севимли шоираси Кавсар Турдиева билан учрашдилар.
Тадбирда сўз олган Кавсар Турдиева фарзанд тарбиясида китобнинг аҳамияти, тарбиядек нозик масалада ота-она нечоғли эҳтиёт бўлмоқлари даркорлиги, болалар билан уларнинг ёшига мос китоблар мутолаасини йўлга қўйиш, кўпроқ ўғил-қизларининг фикр-мулоҳазаларини тинглашга диққатни қаратишлари, уларни қўллаб-қувватлашлари, камчиликларини мулойимлик ва босиқлик билан тузатишлари кераклиги ҳақида ўз ҳаётидан мисоллар келтирган ҳолда сўзлади. Иштирокчиларни қизиқтирган саволларга атрофлича жавоб берди, ўзининг сара китобларидан Ахборот-кутубхона марказига совға қилди. Бугунги авлоднинг фазилати шундаки, у компьютер билан тиллашишга уста, хорижий тилларни яхши билади, ўзига яратилган барча имкониятларнинг қадрига етади. Ҳар жабҳада эришаётган ютуқлари ниҳоятда қувонарли. Уларнинг бундай ютуқларга эришишларида эса албатта китобнинг ўрни беқиёсдир. Зеро, китоблар замонлар денгизида саёҳат қилаётган ва ўзининг қимматбаҳо юкини авлодлардан-авлодларга ташиётган ҳикмат кемаларидир.
Розия ОЙХЎЖАЕВА,
туман Ахборот-кутубхона
маркази библиографи.